Լուրեր

Լույսի ազդեցությունից մինչև նոր հակաբակտերիալ մեթոդներ․ ԱԱԳԼ ռադիացիոն կենսաֆիզիկայի խմբի հետազոտությունները

Ֆիզիկայի, կենսաբանության և քիմիայի համադրությունը ժամանակակից գիտության կարևոր ուղղություններից է, որը նոր հնարավորություններ է ստեղծում ինչպես հիմնարար հետազոտությունների, այնպես էլ կիրառական մշակումների համար։ Այս ուղղությամբ հետազոտություններ է իրականացնում Ա. Ի. Ալիխանյանի անվան ազգային գիտական լաբորատորիայի ռադիացիոն կենսաֆիզիկայի խումբը՝ խմբի ղեկավար, Երևանի պետական համալսարանի կոնդենսացված միջավայրի ֆիզիկայի ամբիոնի դոցենտ Լուսինե Ալոյանի գլխավորությամբ։

 

Խմբի հետազոտությունների հիմնական ուղղություններից մեկը հակաբակտերիալ նոր մեթոդների մշակումն է։ Հաշվի առնելով հակաբիոտիկների նկատմամբ բակտերիաների դիմադրողականության աճը՝ հետազոտողները ուսումնասիրում են լույսի և հատուկ լուսազգայուն նյութերի՝ ֆոտոսենսիբիլիզատորների համատեղ ազդեցությունը։ Այս մոտեցման նպատակն է մշակել հակաբակտերիալ ազդեցության այլընտրանքային մեթոդներ՝ առանց ավանդական հակաբիոտիկների կիրառման։

 

Խմբի աշխատանքները ներառում են նաև ֆոտոսենսիբիլիզատորների կիրառման հնարավորությունների ուսումնասիրությունը հակաուռուցքային ուղղությամբ։ Մասնավորապես, հետազոտվում են ֆոտոդինամիկ թերապիայի և քիմիաթերապևտիկ նյութերի ու ճառագայթման համատեղ ազդեցության հնարավորությունները՝ բուժական արդյունավետության բարձրացման և կողմնակի ազդեցությունների նվազեցման նպատակով։

 

Հետազոտությունների զարգացման կարևոր բաղադրիչ է նաև մասնավոր հատվածի հետ համագործակցությունը։ Խումբը դրամաշնորհային ծրագրի շրջանակում համագործակցում է հայկական դեղագործական ընկերության հետ՝ նպատակ ունենալով հետազոտությունների արդյունքները հետագայում հասցնել կիրառական մակարդակի։ Միաժամանակ զարգանում են միջազգային գիտական կապերը, այդ թվում՝ եվրոպական գործընկերների և COST միջազգային համագործակցության ծրագրի շրջանակում։

 

Խմբի գործունեության կարևոր ուղղություններից է երիտասարդ հետազոտողների ներգրավումը։ Ուսանողները դեռևս բակալավրիատում հնարավորություն են ստանում մասնակցել լաբորատոր աշխատանքներին, իրականացնել ավարտական հետազոտություններ և շարունակել մասնագիտական զարգացումը մագիստրատուրայում։

 

Խմբի հետազոտությունները ցույց են տալիս միջառարկայական գիտության զարգացման և գիտական արդյունքները գործնական կիրառության հասցնելու կարևորությունը՝ միաժամանակ նոր հնարավորություններ ստեղծելով երիտասարդ մասնագետների համար։

 

 

 


Share
  • Facebook
  • Instagram
  • Linkedin
  • Telegram

Սպասվող միջոցառումներ11

Բոլոր միջոցառումները

Առնչվող թեմաներ