Մայիսի 11–16-ը Դիլիջանում անցկացվեց «Առաջընթաց՝ արդյունավետ գիտությամբ. ԱԱԳ-2026» գիտաժողովը, որը համախմբեց Հայաստանի գիտական համայնքի ներկայացուցիչներին՝ գիտնականների, հետազոտողների և երիտասարդ գիտաշխատողների՝ գիտական արդյունքների ներկայացման, փորձի փոխանակման և նոր համագործակցությունների ձևավորման նպատակով։

ՀՀ ԿԳՄՍ նախարարության Բարձրագույն կրթության և գիտության կոմիտեի աջակցությամբ կազմակերպված գիտաժողովի շրջանակում ներկայացվեցին պետական ֆինանսավորմամբ իրականացվող գիտահետազոտական ծրագրերի արդյունքները՝ ներառելով առաջատար հետազոտությունների, գիտական խմբերի և լաբորատորիաների զարգացման, ինչպես նաև նպատակային ծրագրերի շրջանակում կատարված աշխատանքները։

Գիտաժողովի վեց օրերի ընթացքում անցկացվեցին պլենար և զուգահեռ գիտական նիստեր, պաստառային ներկայացումներ և Gong Show ձևաչափով կարճ ելույթներ։ Քննարկվող թեմաներն ընդգրկում էին գիտության լայն շրջանակ՝ տեսական և միջուկային ֆիզիկայից, նյութագիտությունից և նանոտեխնոլոգիաներից մինչև արհեստական բանականություն, կենսաբժշկություն, օրգանական քիմիա, աստղաֆիզիկա և շրջակա միջավայրի ուսումնասիրություններ։

Գիտաժողովում առանձնահատուկ տեղ ունեցավ նաև երիտասարդ հետազոտողների մասնակցությունը․ ուսանողներն ու երիտասարդ գիտնականները ներկայացրին իրենց գիտական աշխատանքները պաստառային և բանավոր ձևաչափերով՝ ակտիվորեն ներգրավվելով մասնագիտական քննարկումներում։

Գիտաժողովի կարևոր բաղադրիչներից էին նաև միջգիտակարգային քննարկումները, որոնք նպաստեցին տարբեր ոլորտների մասնագետների միջև համագործակցության խորացմանը և նոր գիտական նախաձեռնությունների ձևավորմանը։

«Առաջընթաց՝ արդյունավետ գիտությամբ. ԱԱԳ-2026» գիտաժողովը ևս մեկ անգամ հաստատեց նման հարթակների կարևորությունը՝ Հայաստանում ժամանակակից, համագործակցային և մրցունակ գիտական միջավայրի ձևավորման գործում։

ԾԱՂԿՈՂ ԳԻՏՈՒԹՅՈՒՆ, ԿԱՅՈՒՆ ՊԵՏՈՒԹՅՈՒՆ