Միջոցառումներ

ՀՈԲԵԼՅԱՆԱԿԱՆ ՇՆՈՐՀԱՎՈՐԱՆՔ՝ ՀԱՐԳԱՐԺԱՆ ՊԱՐՈՆ ՎԱՍԱԿ ՂԱՎԱԼՅԱՆԻՆ

«Ա. Ի. Ալիխանյանի անվան ազգային գիտական լաբորատորիա (Երևանի ֆիզիկայի ինստիտուտ)» հիմնադրամի (ԱԱԳԼ) անձնակազմը ջերմորեն շնորհավորում է գիտական խմբի ղեկավար Վասակ Ղավալյանին՝ հոբելյանի կապակցությամբ։ Մաղթում ենք նրան քաջառողջություն, ստեղծագործական անսպառ եռանդ, երկար ու արդյունավետ տարիներ և նորանոր հաջողություններ գիտական գործունեության մեջ։

 

1974 թվականին Երևանի պետական համալսարանի քիմիական ֆակուլտետն ավարտելուց հետո Վասակ Ղավալյանն աշխատանքի է անցել ՀՀ ԳԱ Օրգանական քիմիայի ինստիտուտում՝ որպես ավագ լաբորանտ։ 1976 թվականին ընդունվել է նույն ինստիտուտի ասպիրանտուրա և գիտական աշխատանքը շարունակել ԽՍՀՄ ԳԱ Քիմիական ֆիզիկայի ինստիտուտում (Չերնոգոլովկա) և Էլեմենտօրգանական միացությունների ինստիտուտում (Մոսկվա)։ 1980 թվականին պաշտպանել է թեկնածուական ատենախոսությունը, որից հետո զբաղեցրել տարբեր գիտական պաշտոններ՝ կրտսեր գիտաշխատողից մինչև գիտական խմբի ղեկավար։

 

1987 թվականին մասնակցել է Երևանի ֆիզիկայի ինստիտուտի Քիմիական լաբորատորիայի վարիչի պաշտոնի մրցույթին և գիտական խորհրդի քվեարկության արդյունքներով ընտրվել լաբորատորիայի վարիչ։ Նրա ղեկավարությամբ շարունակվել են պոլիստիրոլային առկայծիչների արտադրության և լյումինոֆորների սինթեզի աշխատանքները։ Մասնավորապես, առաջարկվել է Ստոքսի մեծ տեղաշարժ ապահովող լյումինոֆորի սինթեզի նոր մեթոդ, ինչպես նաև մշակվել է ցածր էներգիայով նեյտրոնների գրանցման նոր առկայծիչային համակարգ։ Ստացված արդյունքներն ամփոփվել են մի շարք գիտական հոդվածներում։

 

Վասակ Ղավալյանն անմիջական մասնակցություն է ունեցել ԱԱԳԼ-ում իրականացված Միջազգային գիտատեխնիկական կենտրոնի մի շարք դրամաշնորհային ծրագրերում։ Դրանց թվում են գրաֆիտից ալմաստի ստացման, մոլիբդենից տեխնեցիումի ստացման, անջատման և բնութագրման, ինչպես նաև գերբարակ բազալտե թելերի հիման վրա ատոմակայանների աերոզոլային արտանետումների արդյունավետ կլանիչների ստեղծման աշխատանքները։

 

Նրա նախաձեռնությամբ Հայաստանում սկիզբ են առել խիտին/խիտոզանային համակարգերի հետազոտությունները։ Վերջին տարիներին Վասակ Ղավալյանը շարունակում է այդ համակարգերի անջատման, սինթեզի, բնութագրման և հնարավոր կիրառությունների ուսումնասիրման աշխատանքները։ Հետազոտությունների արդյունքների մի մասն ընդգրկվել է միջազգային բարձր վարկանիշ ունեցող գիտական ամսագրերում հրապարակված հոդվածներում և արժանացել մասնագիտական դրական արձագանքների։ Վասակ Ղավալյանը ավելի քան 60 գիտական հոդվածների հեղինակ և համահեղինակ է։

 

Եվս մեկ անգամ շնորհավորում ենք հարգարժան Վասակ Ղավալյանին՝ մաղթելով քաջառողջություն, մասնագիտական նոր հաջողություններ և գիտական ձեռքբերումներ։ Թող տարիների փորձն ու գիտելիքները շարունակեն ծառայել նոր գաղափարների իրագործմանն ու արժեքավոր գիտական արդյունքների ստեղծմանը։


Share
  • Facebook
  • Instagram
  • Linkedin
  • Telegram

Սպասվող միջոցառումներ12

Բոլոր միջոցառումները

Առնչվող թեմաներ