Լուրեր

Նոր բացահայտումներ գրավիտացիայի տեսությունում LARES-2 արբանյակի տվյալներով Nature ամսագրում

Ա. Ի. Ալիխանյանի անվան ազգային գիտական լաբորատորիայի (ԱԱԳԼ) Կոսմոլոգիայի և աստղաֆիզիկայի կենտրոնի մասնակցությամբ հեղինակավոր Nature հիմնական գիտական ամսագրի համարում հրապարակվել է «LARES-2 satellite measures frame-dragging effect around the Earth» հոդվածը։

 

Հոդվածի համահեղինակների թվում է ԱԱԳԼ Կոսմոլոգիայի և աստղաֆիզիկայի կենտրոնի ղեկավար, պրոֆեսոր Վահագն Գուրզադյանը։ Կենտրոնը ներգրավված է Իտալական տիեզերական գործակալության (ASI) և Եվրոպական տիեզերական գործակալության (ESA) LARES արբանյակային ծրագրում։

 

Հոդվածում ներկայացված են LARES-2, ինչպես նաև LAGEOS և GRACE արբանյակների տվյալների վերլուծության արդյունքները, որոնց հիման վրա գիտնականներին հաջողվել է բացառիկ ճշգրտությամբ չափել տարածաժամանակային քարշի (frame-dragging) երևույթը։

 

Այս երևույթը կանխատեսվել է Ալբերտ Այնշտայնի հարաբերականության ընդհանուր տեսությամբ և նկարագրում է, թե ինչպես է զանգված ունեցող մարմինը պտտվելուց՝ տվյալ դեպքում Երկիրը, ազդում իր շուրջը գտնվող տարածաժամանակային «ցանցի» կառուցվածքի վրա։

 

Հետազոտության արդյունքները հաստատում են հարաբերականության ընդհանուր տեսության կանխատեսումները Երկրի մերձակայքում՝ նախորդ չափումների համեմատ ապահովելով մոտ տասն անգամ ավելի մեծ ճշգրտություն։

 

Բացի հիմնարար ֆիզիկայի ոլորտում ունեցած նշանակությունից, հետազոտությունը կարևոր կիրառական նշանակություն ունի նաև Երկրի գրավիտացիոն դաշտի և մակընթացային երևույթների առավել ճշգրիտ ուսումնասիրման համար։

 

LARES-2 ծրագիրն իրականացվում է միջազգային համագործակցության շրջանակում՝ Իտալական տիեզերական գործակալության (ASI), Եվրոպական տիեզերական գործակալության (ESA) և մի շարք առաջատար գիտական կենտրոնների մասնակցությամբ։

 

Հետազոտության արդյունքները միջազգային լայն արձագանք են ստացել։ Դրանց անդրադարձել է նաև հեղինակավոր Scientific American գիտահանրամատչելի հանդեսը՝ «The Earth is dragging spacetime around its orbit, just as Einstein predicted» վերնագրով հոդվածում՝ ներկայացնելով LARES-2 առաքելության միջոցով իրականացված չափումները որպես տարածաժամանակային ցանցի քաշման երևույթի մինչ օրս ամենաճշգրիտ չափումներից մեկը։

 

Տես նաև՝ ТАСС — «Впервые установлено, как притяжение Земли "закручивает" пространство»։

Share
  • Facebook
  • Instagram
  • Linkedin
  • Telegram

Սպասվող միջոցառումներ6

Բոլոր միջոցառումները

Առնչվող թեմաներ

Փաստաթղթերի նմուշային ձևեր
Ներբեռնել հայերեն տարբերանշանը
Ներբեռնել անգլերեն տարբերանշանը
© 2026 «Ա. Ի. Ալիխանյանի անվան ազգային գիտական լաբորատորիա (Երևանի ֆիզիկայի ինստիտուտ)» հիմնադրամ